1 Armenian str., Feodosiya, Ukraine
Սուրբ Սարգիս եկեղեցին Ղրիմում պահպանված սակավաթիվ միջնադարյան շինություններից է: Եկեղեցու կառուցման թիվն ընդունված է համարել 1363-ը: Սակայն կան այլ տվյալներ, համաձայն որոնց Սուրբ Սարգիսը Թեոդոսիայի հայկական ամենահին եկեղեցիներից է և կառուցվել է 10-րդ դարում: Հայտնի է, որ միջին դարերում եկեղեցում գործել է մանրանկարչության և փորագրության ամենամեծ դպրոցներից մեկը: Այստեղ են ապրել և ստեղծագործել մի շարք մեծանուն նկարիչներ ու գրիչներ: Սուրբ Սարգիս տաճարի ոճը պարզ լինելով հանդերձ, ունի միջնադարյան հայկական եկեղեցական ճարտարապետության բոլոր հիմնական գծերը: 15-րդ դարում եկեղեցուն որպես զանգակատուն ավելացվեց պաճուճազարդ նախշերով տաղավարը: 1888-ի մեծ հրդեհից հետո շինությունը հիմնովին վերանորոգվեց: Վերականգնման համար անհրաժեշտ գումարը տրամադրեց Հովհաննես Այվազովսկին, ով եկեղեցու հետ առանձնահատուկ կապ ուներ. այստեղ էր 1817-ին կնքվել, հետո ամուսնացել առաջին կնոջ հետ: Այստեղ էլ 1900-ին տեղի ունեցավ նրա հուղարկավորության ծեսը: Մեծ նկարչին թաղեցին եկեղեցու բակում, որտեղ մինչև հիմա հեշտությամբ կարելի է նկատել սպիտակ մարմարից պատրաստված նրա քարե դագաղը:
