Մշակույթ Կինո
Սերգեյ Դովլաթովի ընտանիքը Երևանում է
Հոկտեմբերի 12-ին կայացավ «Դովլաթովի հինգ անկյունները» վավերագրական ֆիլմի պրեմիերան, որին նաև հրավիրված էին Սերգեյ Դովլաթովի այրին և դուստրը` ԱՄՆ-ում բնակվող Ելենա և Եկատերինա Դովլաթովները:
Դստեր` Եկատերինա Դովլաթովայի խոսքերով, Հայաստան այցելությունը նոր դռներ բացեց հասկանալու հոր ներաշխարհը: «Այստեղ` Հայաստանում մենք զգացինք ու հասկացանք Սերգեյ Դովլաթովի` որպես գրողի և հոր հայկական գենի կոդը: Լինելով Հայաստանի տարբեր տեսարժան վայրերում և դիտելով ֆիլմը, մենք մեզ համար նրա էության նոր նրբերանգներ բացահայտեցինք»:
«Դովլաթովի հինգ անկյունները» ֆիլմի պրեմիերան «Մոսկվա» կինոթատրոնում էր: Ցուցադրությանը ներկա էին ՀՀ Մշակույթի նախարար Հասմիկ Պողոսյանը, հայ գրող, հասարակական և քաղաքական գործիչ Զորի Բալայանը, մշակույթի այլ գործիչներ և , իհարկե, Դովլաթովի գրական ոճի սիրահարներ:
Սերգեյ Դովլաթովի մասին պատմող հայ-ռուսական համատեղ արտադրության ֆիլմը նկարահանվել է ՀՀ Մշակույթի նախարարության և Հայաստանի ազգային կինոկենտրոնի աջակցությամբ:
Գրեթե 60 րոպե տևողությամբ կինոնկարը ներկայացնում էր Դովլաթովի ստեղծագործության տեղն ու նշանակությունը ռուսական մշակույթի խճանկարում և փորձում էր բացահայտել գրողի երկերի յուրահատկությունը: Հնադիսատեսը նարավորություն ունեցավ տեսնելու այն վայրերը որտեղ ապրել և ստեղծագործել է մեծ գրողը և հասկանալ նրա ստեղծագործությունները այլ` դովլաթովյան ներաշխարհի դիտանկյունից:
Ֆիլմի հեղնինակներն են լրագրող Ազա Բաբայանը և Վլադիմիր Դուբնովը:
