Մշակույթ Կերպարվեստ
Ալտերնատիվ իրականությունն էքզիստենցիալ սրճարանում
Պոչավոր ու պոզավոր, գզգզված մազերով ու տարօրինակ, երբեմն կենդանական, երբեմն էլ բացակայող վերջույթներով, անորեքսիկ կամ չափից ավելի գեր, սուիցիդալ հակումներով ու ագրեսիվ, անմեղ ու սենտիմենտալ. բոլորը մենք ենք:
Մի պահ փորձեք ձեզ կողքից նայել ու վերանալով իրականությունից՝ պատկերացնել ուրիշի աչքերով: Պատկերացնել բոլոր թերություններով ու առավելություններով, զարկ տալ երևակայությանն ու խոստովանել, թե ինչ տարօրինակ կերպար կարելի էր ստանալ: Իսկ եթե չի ստացվում, կա այլընտրանք՝ գնալ Ժան-Պոլ էքզիստենցիալ սրճարան ու աչքի անցկացնել Քրիստինա Հայրապետյանի նկարաշարը:
Հեղինակի այլընտրանքային իրականությունում բոլորս շատ ավելի տարբեր ենք, քան մեզ կարող է թվալ՝ պոչավոր ու պոզավոր, գզգզված մազերով ու տարօրինակ, երբեմն կենդանական, երբեմն էլ բացակայող վերջույթներով, անորեքսիկ կամ չափից ավելի գեր, սուիցիդալ հակումներով ու ագրեսիվ, անմեղ ու սենտիմենտալ: Մեր վախերով ու թուլություններով, կամքի ուժով ու թաքնված տաղանդներով՝ մենք տարբեր ենք, մի քիչ ծիծաղելի, մի քիչ էլ սարսափելի:
Ապրիլի 1-ը ծիծաղի օրն է, և եթե կերպարներից մեկում հանկարծ ձեզ բացահայտեք, անսովոր զգացողությանը հաստատ հաջորդելու է լիաթոք ծիծաղը: Չէ՞ որ ինքդ քեզ հումորով վերաբերվելն է միայն, որ թույլ է տալիս մեզ ու մեր շրջապատին ընդունել այնպիսին, ինչպիսին կանք: Գտե՛ք ձեզ այս ցուցահանդեսում:
