Մշակույթ Թատրոն
Երեք կին ու մեկ տղամարդ N 707 համարում: Երևան: Պրեմիերա:
Երեւանի Հրաչյա Ղափլանյանի անվան դրամատիկական թատրոնում ներկայացվեց ամերիկյան դրամատուրգ Նիլ Սայմոնի «Կալիֆորնիական մեղեդիներ» գործի հիման վրա բեմադրված «N 707» տրագիկոմեդիայի պրեմիերան:
«N 707» ներկայացումը բաղկացած էր տարբեր լուծումներով երեք պատմություններից: Ներկայացման գլխավոր դերակատարներն էին Լուիզա Ղամբարյանը, Ալիսա Մելիքսեթյանը և Հրաչյա Հարությունյանը, որը նաև ներկայացման բեմադրող ռեժիսորն է:
Ներկայացումը «պայթեցրեց» բեմը մոդեռնիստական կահույքով, հարուստ դեկորներով և լուսային լուծումներով. այս ամենին ավելացավ ֆրենկ Սինատրայի «Նյու Յորք» երաժշտությունը, որն ուղղակիորեն ամբողջական դարձրեց այս շոու-ներկայացումը: Հյուրանոցային 707 համարի շքեղաշուք և կոկիկ տեսքն ակյնհայտորեն արժանացել էր հանդիսատեսի համակրանքին:
Առաջին գործողություն
Հյուրանոցի 707 համարում բնակվում են երեք տարբեր ճակատագրերով կանայք, երեքին էլ մարմնավորում է հանդիսատեսի և հեռուստադիտողի կողմից սիրված, գնահատված դերասանուհի Լուիզա Ղամբարյանը:
Հաննան, որ առաջին պատմության մեջ 40 տարեկան ամուրի, լեզվանի, դժվարությամբ զիջող, «բիզնես լեդի» է, բաժանումից հետո կապվել է 24 տարեկան երիտասարդ տղայի հետ, որը գրում է «Washington» թերթում: Պերճախոս կին, որ ամուսնուն խոսքի իրավունք չի տալիս և ամեն պահը օգտագործում է խայթելու համար, և ամուսինը՝ Բիլլին, որ, ամուսնալուծությունից հետո հետևելով առողջ ապրելակերպին, թողել էր ծխելը, չէր օգտագործում ալկոհոլ, քնելու համար հաբեր չէր օգտագործում, նախընտրությունը տալիս էր բնական հյութերին, թեպետ սիրեկան ունենալու հարցում չէր զիջել կնոջը: Հաննայի և Բիլլի կապող օղակը նրանց 17-ամյա դուստրն էր: Աղջիկը գերադասում է մնալ հոր մոտ: Թեպետ մայրը դրա հետ այդքան էլ համաձայն չէ, սակայն փոխզիջման է գնում և աղջիկը մնում է հոր մոտ:
Երկրորդ գործողություն
707 լյուքս համարում բնակվող Սիդնեյը հոգատար, ուշադիր, սուր հումորի զգացում ունեցող, հմայիչ տղամարդ է: Նա փորձում է «Օսկար» մրցանակաբաշխություն գնալուց առաջ շքեղ, ակնհաճո զգեստով, տոնական սանրվածքով և գեղեցիկ աքսեսուրաներով զարդարված կնոջը`Դիաննային հավատ ներշնչել, որ այդ ճաղատ, մերկ մարդու մրցանակը նրան է շնորհվելու: Չկայացած դերասանուհու աստեղային ժամը այդպես չի գալիս. իր չիրականացված երազանքը նա խեղդում է ալկոհոլի մեջ: Իսկ ամուսինը հերթական դասական պահվածքով փորձում է հանգստացնել հարբած կնոջը, որ ամեն խոսքի մեջ նշում է` «Սա մեր համարը չէ»:
Երրորդ գործողություն
Երրորդ գործողությունը սկսվում է ամուսնական դվաճանության տեսարանից: 707 համարում ամուսինը գլխացավով արթնանում է շիկահեր, մետաքսե գիշերազգեստով աղջկա կողքին, այն էլ` այն անպատեհ պահին, երբ կինը ներս է մտնում...
Ձևավորում
Բեմն այդչափ իրական ձեևավորելու ու լուսավորելու` Հրաչյա Հարությունյանի մտահղացումը գերազանց էր իրականացված. հանդիսատեսն անմիջապես տեղափեխվում էր այդ միջավայր: Հատկապես թանկարժեք կահույքի և Ճկուն էկրանով հեռուստացույցի ընտրությունը բեմը բավական հարուստ զարդարված հյուրանոցի համարի էր վերածել: Ինչ վերաբերում է սյուժեին, ապա ռեժիսորը բազմիցս ծամած և լղոզած լուծումներ չէր տվել, գովելի փաստ է: Պիեսում հանդիսատեսին գայթակղող հատվածները շատ էին. ուղեղ մաշող, կռվարար կանանց ձայներ չկային: Սյուժեի դինամիկ զարգացում, հետաքրքիր ու զավեշտալի երկխոսություններ և այլն: Այս ներկայացման հաջողության բանաձևը ՝ դերասան-ռեժիսոր (դերասան) շփում կար, հոգեվիճակներ էին փոխվում, ինչ-որ մի նոր կյանք էր ծնվում: Արժանի է դիտելու:
