28 Սեպտեմբեր 2013, 09:07
130 |

Անտառ նկարողները

Նկարիչները նվազագույն գներով են վաճառում իրենց աշխատանքները, որպեսզի աջակցեն Բուսաբանական այգու նախաձեռնությանը։

Հայաստանում շատ ծառատեսակներ վերացման եզրին են. իրավիճակը շտկելու համար Երևանի բուսաբանական այգու տնօրինությունը Վայրի բնության ու մշակութային արժեքների պահպանման հիմնադրամի հետ ծրագրել է տնկարան ստեղծել, որն էլ մի քանի տարի հետո տնկիներով կապահովի անտառներին։

Աշունը սերմեր հավաքելու իսկական ժամանակն է։ Հոկտեմբերին Բուսաբանական այգու մասնագետները կուղևորվեն Նոյեմբերյանի անտառներ ու հացենու, թխկենու, բոխու, կաղնու և այլ ծառատեսակների սերմեր կհավաքեն։ Հետո դրանք տնկարանում կաճեցնեն ու կխնամեն։ 13 000 քմ է տնկարանի տարածքը, որտեղ նախատեսվում է աճեցնել մինչև 150 000 տնկի։ Բուսաբանական այգին աշնանն ու ձմռանը չի ոռոգվում. ջրամատակարարման սեզոնը փակվում է։ Բայց քանի որ տնկիներ աճեցնելու նպատակը հաստատ է, ուստի այգին որոշել է իր գլխի ճարը տեսնել։ Միակ հույսն այգու խորքային ջրհորն է, որը 10 տարուց ավելի չի շահագործվում. պոմպն է փչացել։ Սարքելու համար 6.500 դոլար է պետք։ Եթե պոմպն աշխատի, հնարավոր կլինի տնկանյութն աճեցնելու գործընթացն սկսել։

Այստեղ էլ օգնության հասան, Բուսաբանական այգին ու «Սոբեսեդնիկ Արմենիի» թերթը որոշեցին ուժերը մեկտեղել։ Թերթը բնապահպանական ուղղվածությամբ ծրագրեր է իրականացնում, և Բուսաբանական այգու տնկարանի ճակատագրով հետաքրքրված՝ բարեգործական ծրագիր է նախաձեռնել։ Շահագրգիռ երկու կողմերին միացել են նաև տասնյակ նկարիչներ։ Հեղինակավոր ու նորաթուխ ստեղծագործողները 150 նկար են տրամադրել, որպեսզի Բուսաբանական այգում իրականացվի դրանց ցուցահանդես-վաճառքը։ Ամենաէժան գործը 100 000 արժե, ամենաթանկը՝ 600 000։ Գրաֆիկա, նատյուրմորտ, բնանկար, աբստրակցիա. ցուցահանդես-վաճառքի համար չկա ժանրային սահմանափակում։ Նկարիչները նվազագույն գներով են վաճառում իրենց աշխատանքները, որպեսզի աջակցեն Բուսաբանական այգու նախաձեռնությանը։

Բարեգործական բացօթյա վաճառքը սկսվել է սեպտեմբերի 27-ին, կշարունակվի մինչև 28-ի ուշ երեկո։ Այնուհետև աշխատանքները կամփոփվեն մեկ ընդհանուր կատալոգում ու կցուցադրվեն «Սոբեսեդնիկ Արմենիի» թերթի կայքում։ Վաճառքը կշարունակվի օն-լայն։ Այնքան ժամանակ, մինչև կհավաքվի պահանջվող գումարը. 2 մլն 850 000 դրամ՝ տնկանյութերին ջուր հասցնելու և, հետևաբար, 1-3 տարի հետո Հայաստանի հյուսիսային լերկ շրջաններին մատղաշ տնկիներ հասցնելու համար։

Այս թեմայով