Հոկտեմբերի 5-11-ը հայկական ՏՀՏ ոլորտի պատվիրակությունը մասնակցում էր Ստամբուլում կայացող Startup Istanbul խոշոր տարածաշրջանային միջոցառմանը։
«StartupIstanbul» ֆորումը համախմբել էր 500-ից ավելի սթարթափերի, Եվրոպայից, ԱՄՆ-ից, Թուրքիայից, եւ այլ երկրներից ժամանած ներդրողների, ոլորտի առաջատարների: Հայաստանյան 10-ը ընկերությունները այդ 500 սթարթափերի շարքում էին ընտրված: Այն բացառիկ հավաք է, որտեղ տարածաշրջանի տարբեր երկրների սթարթափեր հնարավորություն են ունենում ներկայացնել իրենց նորարարական բիզնես գաղափարները, դրանց իրականացման վերաբերյալ տարբեր միջազգային փորձագետներից ստանալ խորհուրդներ և ներդրողների հետ հաստատել գործարար կապեր:
Հայաստանի պատվիրակությունը «StartupIstanbul» տարածաշրջանային ֆորումին ներկայացել էր հետևյալ ընկերություններով՝
Heltun - «խելացի» տան կառավարման համակարգեր
Skycryptor – ամպային տվյալների անվտանգություն
LiTech – լուսավորության նորարար տեխնոլոգիաներ
HY Pictures - ինտերակտիվ գրաֆիկական պատմվածքներ
Bookoholics – բջջային հավելված գրքասերների եւ ծանոթության համար
Earlyone – հերթերի առցանց համակարգերի կառավարում
HurryApp – կազմակերպություններին նոր հաճախորդներ բերող մարքեթինգային ստեղծարար գործիք
DressZone – կանանց համար իրենց զգեստների վարձույթի միջոցով գումար խնայելու և վաստակելու առցանց համակարգ
FortuneCup – բախտագուշակների հետ իրական կապ հաստատող բջջային հավելված
ArmNomads - խաղերի ծրագրավորում
Skycryptor նորաստեղծ ընկերության հիմնադիր Արամ Ջիվանյանը հայտնվեց լավագույն 15 սթարթափերի շարքում` եզրափակիչ փուլին, ավելի քան 4000 հյուրերին ներկայացնելով գաղափարն ու սթարթափը:
Y combinator-ի գործընկեր Ադորա Չյունգը սթարթափերին խորհուրդ է տալիս դադարել մշտապես մտածել գումարի մասին: «Կենտրոնացե՛ք ստեղծելու իրական արժեքներ: Դա ձեր հաջողելու նախապայմանն է»,- նշում է նա:
Արժեքների, կապիտալի ստեղծումը հնարավոր է միայն հարմարավետության գոտուց դուրս գալու պարագայում: StartupIstanbul-ի մեկ այլ բանախոս, ՛՛From The Other Side of The World՛՛-ի հեղինակ Էլմիրա Բայրասլին սթարթափերին հորդորում է չակնկալել ստեղծել նորարություն՝ ապրելով հարմարավետության մեջ: «Նորարությունը ծնվում է անհարմարությունից: Դադարե՛ք արդարացումներ գտնել և պատասխանատվություն ստանձնեք»:
Ադորա Չյունգն էլ խորհուրդ է տալիսգաղափար ունենալու դեպքում չհապաղել, սկսել անմիջապես. «Իսկ եթե չունես գաղափար, ապա պետք է աշխատել արագ աճող սթարթափի հետ և սովորել՝ ինչ պետք է անեն և չանեն ձեռնարկատերերը»:
Սթարթափում հաջողելու համար բանախոսները խորհուրդ են տալիս կանգ չառնել, չփնտրել ավելի լավ ժամանակ ձեռներեցությամբ զբաղվելու ու բրենդ ստեղծելու համար: Ստեղծել սեփական սթարթափի զարգացման ռազմավարությունը, գործել միասնական:
Նախագիծը մասն է կազմում «Աջակցություն Հայաստան-Թուրքիա կարգավորման գործընթացին» ծրագրի, որին աջակցում է Եվրոպական միությունը: ՄԻՖ(MEF) (Թուրքիա) համալսարանի փոխռեկտոր, թուրք ձեռներեցների շրջանում ազդեցիկ դեմքերից Էրհան Էրկուտը նշել է, որ Հայաստանի և Թուրքիայի ՏՏ ոլորտների միջև համագործակցության մի շարք հնարավորությունների ներուժ է տեսնում: «Սա քաղաքականություն չէ, սա էկոնոմիկա է և բարեկեցություն»:
«StartupIstanbul»-ի մասնակից, HY PICTURES-ի հիմնադիր Հասմիկ Հովհաննիսյանը մեծ ձեռքբերում է համարում այն, որ արևմտահայ գրականության կոմիքսներով հետաքրքրվել են թուրքական հրատարակչությունները, և հնարավոր է՝ դրանք թարգմանվեն և տպագրվեն թուրքերեն լեզվով:
Հայաստանյան մասնակիցները պատմում են, որ թուրքիայի մասնակիցների հետ շփումներում խոչընդոտներ չեն եղել:
«Երբ թուրք մասնակիցները, հարցնում էին` որտեղի՞ց եք, ասում էինք` Հայաստանից, ասում էին՝ Հայաստանի՞ց եք, ինչ լավ է, որ եկել եք այսօր: Շփումը նույնն է, ինչ Պակիստանի, Ամերիկայի ներկայացուցիչների հետ, վերաբերմունքի տարբերություն մենք չենք զգում»,- ասում է StartupIstanbul-ի մասնակից, Earlyone սթարթափի ներկայացուցիչ Ֆլորա Բաբաջանյանը:
Հայկական LiTech նորաստեղծ ընկերությունն արդեն իսկ Kworks թուրքական աքսելերատոր ծրագրի կողմից համագործակցության առաջարկ է ստացել:
Ֆորումին հայկական պատվիրակության մասնակցությունն իրականացվել է Հանրային լրագրության ակումբի (Հայաստան) եւ ՏԵՊԱՎ հիմնադրամի (Թուրքիա)՝ «Ձեռներեցների փոխայցելություն» նախագծի միջոցով: Վերջինս մասն է կազմում «Աջակցություն Հայաստան-Թուրքիա կարգավորման գործընթացին» ծրագրի, որին աջակցում է Եվրոպական Միությունը:
IEEE EWDTS 2016 Yerevan. Հզոր 15-յակն ու այլ հզորները